كرامتى وحبى..ايهما ابدى؟؟

اصون كرامتى من اجل حبى..فان النفس عندى فوق قلبى

رضيت هوانها فيما تقاسى..وما اذرلها فى الحب دأبى

فما هانت لغيرك فى هواها..ولا مالت لغيرك فى التصبى

ولكنى اردت هوى عفيفا.. ورمت لك الهنا فى ظل قربى

تبادلنى الغرام على وفاء.. واسقيك الرضا من كاس حبى

ولما ايقنت روحى بشر..وكان الغدر فى عينيك ينبى

هجرتك والأسى يدمى فؤادى..وصنت كرامتى من قبل حبى

ده طبعا مقطع من اغنيه لام كلثوم..

تفتكروا ياجماعه فى كرماه بين المحبين؟؟الاكيد انهم بيصونوا كرامه بعض..لكن هل الصح انها تبقى بينهم اصلا؟

بمعنى تانى..نشيل حاجز الكرامه وللا نخليه بينا ..وهل وجوده ممكن يسبب مشاكل ؟؟

مستنيه رايكم ياجماعه..

اولا احب ارحب بيكى يا زهرة الشتاء فى اول مشاركاتك معانا واول موضوع ليكى
اهلا وسهلا بيكى فى بيتك التانى
بصراحه الموضوع حلو جدا
لو الاتنين بيحبوا بعض فعلا يبقى اكيد هيحافظوا على كرامة بعض
مش هيستنى اى طرف منهم انه يعمل حاجه عارف انها ممكن تجرح كرامته اوتضايقه
مش هيقبل على نفسه انه يكون سبب فى انه يزعله لانهم قلبين فى قلب واحد
وزى ماذكرت فى الاول لازم يكونوا بيحبوا بعض فعلا مش منتظرين حاجه تانيه من ورا الحب ده
اما بالنسبه لحاجز الكرامه ده
احنا قلنا لو الاتنين بيحبوا بعض يبقوا هما اللى هيبنوا لبعض كرامتهم والبرستيج الخاص بكل واحد
قدام الناس لكن بينهم اعتقد انهما لازم يكونوا طبيعين متفصلش بينهم حواجز لان كل طرف بيستمد كرامته من الطرف التانى ولازم كل طرف يبين للتانى انه قادر انه يحافظ عليها وانه قد المسئوليه تجاهه
شكرا ليكى على مشاركتك باول موضوع وننتظر المزيد من المواضيع والمشاركات الفعاله
ربنا يوفقك ومزيد من التقدم

أولا أزيك يازهرة الشتاء
ثانيا نورتى المنتدى
ثالثا بالنسبة لسؤالك فطبعا لو هم الاتنين بيحبوا بعض أستحالة يبقى فى حاجة بينهم أسمها كرامة لأنه من الصعب أن أنسان يكون بيحب أنسان ويجرح كرامته لأنه مدام بيحبها أو بتحبه يبقى أكيد عارف ايه اللى بتحبه وايه اللى بيضايقها
موضوع جميل يازهرة الشتاء مشكورة

ميرسى كتيييييييييييير ل shetos ولاميره الطفول على ترحيبكم بيا...وانا طبعا متفقه معاكم ان لو فى حب مابين الطرفين مش بيحطوا حاجز الكرامه بينهم..بس اللى بحسه انه لو كترت المشاكل بينهم فى وقت من الاوقات ممكن ساعتها يبدأ الحاجز ده فى الظهور...كمثال على اللى بقوله ان احيانا كرامه الراجل بتظهر لو زوجته وصلت فى وقت لدرجه وظيفيه اعلى منه..
ومره تانيه بشكركم على ردودكم وترحيبكم بيا..

زهره الشتاء
اولا بهنيكي علي حسن اختيارك لمواضيعك
ثانيا اجابه تساؤلك
المحب لا يري عيوب محبوبه بل يري كل ماهو رائع فيه
ثانيا نجد ان اعظم العظماء والمشاهير كانوا بيركعوا لاحبائهم
اقوي الناس باسا واعظمهم كرامه بيكون كالطفل عندما يكون مع محبوبه
الحب علاقه اقوي من ان تعترضها اي حواجز
وشكرا علي التوبيك الرائع

اولا ..ميرسى ليك يافارس عالرد واهنيك على اسلوبك الرائع
ثانيا..انا متفقه معاك بس انا شايفه ان حياتنا دلوقتى اصبحت مفتقده للرومانسيه اوى ودخلت معايير جديده للحب والارتباط فالحب اصبح ضعيف فى اوقات كتير وعرضه لانه يضيع وحاجات تانيه تطغى عليه ..وميرسى ليك مره تانيه

أولا أهلا بحضرتك

اصون كرامتى من اجل حبى..فان النفس عندى فوق قلبى
رضيت هوانها فيما تقاسى..وما اذرلها فى الحب دأبى

فما هانت لغيرك فى هواها..ولا مالت لغيرك فى التصبى

ولكنى اردت هوى عفيفا.. ورمت لك الهنا فى ظل قربى

هوه الحقيقه إجابه سؤالك موجود ف الابيات الجميله دى وتفسيرها ان كلا الحبيبين بيصونوا ويحافظوا على كرامة بعض لحبهم الى عيشينه لان لو بيحبوا بعض بجد كرامتهم هما الاتنين هتبقى واحده وهمه الاتنين هيرعوها مع نفسهم ومع غيرهم....

تبادلنى الغرام على وفاء.. واسقيك الرضا من كاس حب

أما فى حاله الغدر زما بتقول الاغنيه
مثلا حصل مشاكل بينهم أو حد خان التانى لازم للكرامه يكون ليها دور هوه الى بيرفع من شأن الواحد ف وقت ضعفه وزما بيقولوا الحب غدار أما لو مكنش فيه كرامه للواحد ف الحاله دى هيبقى ضعيف وخسر كل حاجه حبه ووفائه وكمان خسر كرامته....
هجرتك والأسى يدمى فؤادى..وصنت كرامتى من قبل حبى

وشكرا ليكى ع التوبك والمناقشه الحلوه دى ويا ريت اكون أفدت بحاجه يا زهرة الشتاء

اولا شكراااااا ليــكى يا زهره الشتــا على موضوعك الجميــل
وانا راييى ان الكرامه مهمه جداااا فى كل حاجه مش فى الحب بــس واهم من اهو حاجه
مثلا لو افترضنا ان حد بيحب حد قوى بس مش قادر يحافظ على كرامته قدامه
اعتقد ان مهما كان الوقت بينهم لازم هيجى يوم ومش هينفع يكملوا مع بعض ( استحااااله )
لان الانسان معروف بكرامته مش معروف بحبــه
وبجد يا بخت اتنين بيحبوا بعض وبيقدروا يحافظوا على كرامه بعــض
اكيــد دول عرفوا يمشووا فى الطريق الصح من البدايــه
وانا بشكرا جداا كمان مره يا زهره ع الموضوع
وربنـــا يوفقــــــــــك.........

شكرا ل boody على رايك بجد هو راى حلو ومتزن وانا متفقه معاك فعلا ان الكرامه لازم تظهر وقت الغدر والخيانه عشان تقوينا..
وبشكر kemo جدا وطبعا هو حلو اوى اننا نحافظ على كرامه بعض ونراعيها فى اى وقت بس متهيالى اننا لازم فى اوقات نقدم تنازلات او نتسامح مع اللى بنحب فى حاجات جايز مانتسامحش فيها مع حد غيره بس عشان نحافظ على حبنا لانه حاجه تستحق اننا نضحى شويه عشانها..وميرسى ليكوا مره تانيه

اهلا بيكى يا زهرة الشتا ...

اولا .. بحيكى عـ الموضوع الذيذ دا اللى فعلا فكرته حلوة وتخلى الواحد يفكر شوية قبل ما يجاوب
مممممممممممممممممممممم

ثانيا بالنسبة لموضوع الكرامة والحب دا .. انا متفق مع زمايلى فى آراؤهم واغلب اراؤهم تقريبا مقنعة .. لكن اذا سمحتيلى احب اتطرق لجزئية مختلفة ... وهى ان كل من الكرامة والحب جزء طبيعى من كيان الانسان وفطرة ربنا خلقه بيها ... تمام .... وكل حاجة ليها اسبابها ودوافعها واوقات ظهورها ... اقصد لو فيه حب "بجد" يبقى مفيش حاجة اسمها كرامة وسط الحب .. ظهر كبرياء او كرامة جواه .. يبقى اكيد فيه مشكلة فى الحب دا ... وبالاحرى احد الاشخاص ياما الاول مقدرش يحافظ على مشاعر التانى او التانى كرامته افضل من حبه فى وجه نظره .. يعنى نتوسط ونسامح وعلى راى كيموا نتعلم نحافظ على مشاعر بعض ازاى ... ولو حبينا نتكلم بواقعية شوية ... نوازن بين كل شىء فى حياتنا الاولويات والضروريات والحقوق والواجبات .. ومنتطرفش لاى شىء من دووووووووووووول

آسف طولت عليكى زهرة الشتاء
دا اول توبيك ليكى تقريبا مش كدا ...
ربنا يوفقك .. توبيك لذيذ فعلا ...

بشكرك مرة تانية

تحياتى
عمووووور

[quote="زهرة الشتاء وبشكر kemo جدا وطبعا هو حلو اوى اننا نحافظ على كرامه بعض ونراعيها فى اى وقت بس متهيالى اننا لازم فى اوقات نقدم تنازلات او نتسامح مع اللى بنحب فى حاجات جايز مانتسامحش فيها مع حد غيره بس عشان نحافظ على حبنا لانه حاجه تستحق اننا نضحى شويه عشانها..وميرسى ليكوا مره تانيه[/quote]

انا بجد اسف انى هرجع للموضوع تانى بس هو بجد موضوع مهم اوووووووى
وانا ليا تعليق صغنون على ردك يا زهره انا طبعا معاكى فى تنازلات صغيره علشان المركب تمشى
بس فيه تنازلات ما ينفعش نعديها ( واكيد طبعا التضحيه فى الحب موجوده بس بحدود)
لو عدت الحدود دى مش هتبقا تضحيــه !!!!!!!

فاحنا لازم نفرق بين التنازلات اللى فى مجال التضحيه والتنازلات اللى بره التضحيه..

ميرسى ل3moor على ردك وعلى ترحيبك بيا..وفعلا التوازن شئ مهم ويارب كلنا نقدر نوصله ونحققه فى حياتنا وطبعا ده هيكون افضل بدعم الطرف التانى
و ل kemo ده شئ يشرفنى انك ترجع للموضوع تانى وتالت كمان..وفعلا عندك حق التضحيه لها حدود ولازم كمان تبقى من الطرفين لانها لو كانت من طرف واحد مايبقاش حب
ميرسى ياجماعه على ردودكم

الموضوع جميل زاهره الشتاء بجد
المهم الكرامه شئ ضرورى جداااا ولازم نهتم بيها انتى سالتى فيه كرامه بين المحبين وانا بقولك اه بس مش تبقى بينا لان الحب ده بيغطى عليها اما لو كان مش حب الكرامه ديه بتبقى بينه وكل واحد بيحس بيها بزات للى بيصارح الشخص التانى بلحب ممكن يستغل العلاقه ديه وانا بنصح اى حد لو كان كده تبقى الكرامه اهم والحب بعدين لان مافيش كرامه يبقى مافيش انا

ميرسى ليك يا mero على رايك.. بس انا شايفه ان لو حد استغل ان التانى بدا بالمصارحه كده يبقى مش حب حقيقى لان الحب مافيهوش انا وانت فيها احنا بس..ومتشكره بجد على رايك

عندك حق استغلال يعنى مافيش حب ديه اشتغاله او ضحك ععلى الواحد وشكرا على المتابعه

اولا ميرسى على التوبيك

ثانيا انا شايفة ان اللى بيحب حد بيصون كرامته ولو ماعملش كدا يبقى مايستاهلش الحب دا.

توبيك هايل يا زهرة انا بحييكى عليه
وبحييكى على سماعك لام كلثوم (الاغانى اللى بجد) طبعا فى ناس كتير جدا مش بتسمع ام كلثوم وبيهاجموها كمان طبعا لولا اختلاف الازواق لبارت السلع ..... بس بحييكى على زؤك

وبالنسبة للاجابة على سؤالك المحرج ده يتهيألى انه بين الشاب وحبيبته خط كرامة رفيع اوى مينفعش ينقطع وإلا العملية تبوظ منهم

بالتوفيق

ميرسى ليكى يادمعه على ردك.. وميرسى ياطايش على تحيتك وفعلا ام كلثوم ماينفعش ماتتحبش وميرسى على ردك

مساكم الله بالخير يامنتدى الحب والسعادة

وأقول للقوارير - ( البنات طبعا ) لستنَّ من العفاريت بل من الملائكة
فالنسبة الرقيقة مؤنثة
الوردة الجميلة مؤنثة
الشمس المشرقة مؤنثة
موجة البحر الهادئة مؤنثة
حتى الضحكة مؤنثة
الابتسامة مؤنثة
--------------------------------------
ممكن تقولي لي من يخطر على باله أن يحطم كل هذه ( التاءات ) تاء التأنيث طبعاً
ويكسر قلبها أو يهين كرامتها؟؟؟
كيف وكرامتها من كرامته -- وعزها من عزة - وقوتها تستمدها من قوته
كيف وأنت وصفتيه بالحبيب -- كيف يجروء القلب الذي أحب أن يهين
كيف وقد أعطى كل منهم للآخر مالا يقدر بثمن وهو ( القلب ) الذي ينبض بالحب والعطف والحنان.
آآآآآآآآآآآآآسف لا أجد من اللائق أن نطلق على هذا الشخص لفظ آدمي أو انسان
( القلب الذي تعلمم الحب - لا يعطي إلا الحب )

ميرسى ياكاجو على رايك وكلامك الرقيق...بس هو انك تلاقى حد بيفكر برومانسيه دلوقتى باه شئ صعب جدااااااااااااا.... بس لو نعرف انه بعد ماعمرنا يبقى فنهايته مش هيفضلنا غير طاعتنا لربنا وحبنا اللى اديناه للغير عشان كده رجعلنا متهيالى راينا هيتغير
ميرسى على ردك مره تانيه